MBOSE-ni bangki porikkarangko ra·doattaia

TURA: Meghalaya a·doko COVID-19-ko man·giparang batroroengani gimin May-ni 11 aro 12 tarikrango ong·atna manchisogimin MBOSE-ni bangki porikkarangko ra·doatna nangtaiaha ine sorkari official-rang u·iataha.
Indake ong·engon, Sorkari somoi namako nigrike ong·atanggen ine Education Minister Lahkmen Rymbui mijalo aganaha.
Education Minister Lahkmen Rymbui-ni aganani gitade, sak 200 mang high risk contact-o ong·gipa chatri chatrirang donga, jemangan porikkarangko serikna man·jaha.
MBOSE-ni bangki dongkuenggipa HSSLC porikkarangko re·anggipa May-ni 6 aro 7 tarikrangoniko May-ni 11 aro 12 tarikrangona ra·doatskaahachim indiba da·o obostarang namjabatroroengani gimin May-ni 11 aro 12 tarikrango ong·atna tik ka·giminkoba ra·doattaina nangao ga·akaha ine official-rang u·iataha.
HSSLC-ni da·o bangki dongkuenggipa subject-rangara Music (Western), Physical Education, Computer Science/Computer Application, Informatics Practices, Statistics aro Vocational subject-rang ong·engachim.
Teachers ba skigiparangko Covid tika su·ani bidingo sing·anina aganchakengon, tika su·na bilsi sokgiminrangde su·na nang·a, Rymbui aganaha, unomitingo bilsi sokgiminrangba tika su·na simsaktokjani gimin ua suk ong·gijanikoba parakaha.
Unomitingo, internet-rang tik ong·jani gimin Meghalayao online class-rangko ra·anio, chatro chatrirangna aro skigiparangna namen ra·biani ong·a ine skigiparang suk ong·gija parakaha.