TURA: Raksamgre civil sub-division-ni ning·o Photamati-oni Jangrapara-ona dakanggipa ramako re·anggipa bilsio chi banani somoio pe·angaonin taripile on·kujaengani a·sel da·o ia ramako re·ruraenggipa manderang aro mongsongbate Tikrikilla-ona songreenggipa manderang neng·nikanirangko chagrongna nangtokenga ine Raksamgre-ni Garo Students Union (GSU) Western Zone (West) parakatenba, ia ramako ta·raken taripile on·china sorkariko didiataha.
Iani bidingo a·dokni PWD Minister Prestone Tynsong-na sedoatengon, Photamati-oni Jangrapara-ona dakanggipa PWD ramako adita bilsirangna skangsan tariahachim indiba re·anggipa bilsio mikkarang jimbee waangani somoio chirang bane ia ramako pe·angaha aro untalan ia ramako taripile on·kujaengani a·sel ia ramako re·ruraenggipa manderang aro mongsongbate Tikrikilla-ona re·rurae poraienggipa chatro chatrirang aro gipinrangba neng·nikanirangko chagrongna nangtokengaha ine GSU Western Zone (West) Raksamgre-ni dilgiparang parakataha.
“Uni gimin GSU-ni palo aro jolo songdongenggipa manderangni pal chinga ia ramako ta·raken taripile on·china mol·molenga,” ine GSU-ni dilgiparang, PWD Minister-na sedoataha.
