TURA: West Garo Hills a·jaoba COVID-19 man·giparang ta·raken batrorobaengahani gimin Sombar salo, Tura bazar-o dokkan dakgiparangko porikka ra·e nion dokkano dongtimgiparang aro me·su palgiparangoni saksni positive ong·aha ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, West Garo Hills a·jao aro mongsongbate Tura-o COVID-19-ko man·giparang batrorobaengani gimin Tura Bazar-o dokkan dakgiparangko COVID-19-na porikka ra·e niangon, dokkan dakgiparangoni gimik saksni positive ong·aha.
Sombar salsani gisepon West Garo Hills a·ja gimiko sak 46 manderang, COVID-19 positive ong·dapaha aro uandaken da·o West Garo Hills a·jao COVID-19 man·e dongenggiparang gimik sak 279 gapengaha ineba Singh parakataha.
Sombar salo sak 19 manderang ia COVID-19-oni nampilna gita man·skaaha aro uandaken da·o West Garo Hills a·jao COVID-19-oni nampilgiparang gimik sak 131 gapskaengaha ine Deputy Commissioner u·iataha.
Indake ong·engon, Tura bazar-ona koros ka·na re·anggipa manderangko an·tangtangna simsakchina, mask-rangko mitapgni ganchina, jakrangko rongtale rakkichina aro skatang dokkanrango nape apchangket ong·atjachina gitaba Deputy Commissioner didiataha.
Tura jillani ning·o donggipa dingtang dingtang bazar antirango aro manderangni jinma tom·chakgipa biaprangoba COVID-19-na porikka ra·e niangkugen ineba Deputy Commissioner u·iataha.
