TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·kujaengani gimin kamtangtangko ka·gija jingjengattokengon, kam ka·giparang baksa changbrina agangrike kamtangtangko ka·piltaichina mol·molahaoba chu·sokgipa ong·na man·kujaenga ine GHADC-ni gital executive committee (EC), suk ong·gijaniko parakataha.
GHADC-ni gital deputy chief executive membor Nikman Ch Marak-ni parakatani gitade, GHADC-o tangka paisarang dongsrangjaengani gimin kam ka·giparangko aro Non-Gazetted Employees Association (NGEA)-ni dilgiparangko gronge uamang, jabongani dormaharangko on·na ku·rachakenba, kamtangtangko ka·taipilchina mol·molahachim indiba kam ka·giparang, an·tangtangni jingjengataniko ra·galpilna jechaktokaiahachim.
“GHADC-ni gital CEM-na seokako man·ani bakan Benedic Marak, apsan salon jingjengatenggipa manderangko okame, uamangni dabienggipa kamrangni bidingo agangrikahachim indiba chu·sokgipa ong·na man·jaha,” ine Nikman Marak parakataha.
Uni ja·man, April-ni 28 tarikoba GHADC-ni executive committee, kam ka·giparangko aro mondolini dilgiparang baksana Nokma Council, NGO-rang aro gipin dilgiparangko okame apsan iani bidingo chanchirimangtaiahachim ine Marak parakataha.
“Ia tom·anio dingtangmancha ‘Good Governance of GHADC’-ni bimingo committee-ko songe ia committee-ni convenor-na Rev FD Sangma-ko songe donangaha. April-ni 30 tariko Rev FD Sangma aro dingtang dingtang mondolini dilgiparang, GHADC-o kam ka·enggiparangko gronge agangriktaiahachim indiba ia tom·anioba chu·sokgipa ong·na man·jaha,” ine GHADC-ni deputy CEM parakataha.
Iani ja·mano, executive committee aro opposition dolgnini MDC-rangan Tura circuit house-o tom·aniko ong·atangaha aro high level committee-ko songe donangenba, ia committee-jni convenor-na ruling-oniko deputy CEM Nikman Ch Marak aro co-convenor-na opposition doloni MDC Cherak W Momin-ko songe donangaha ine u·iataha.
High level committee-ko songani ja·man May-ni 4 tariko committee-ni membor-rang, CEM-ni office-on NGEA-ni dilgiparangko aro mondolini dilgiparangko okame tom·aniko ong·atangtaiaha.
“Ia tom·anio kam ka·giparangna jagittamni dormahako on·na ku·rachake kamtangtangko ka·pilchina committee-ni membor-rang mol·molahaoba, uamang ja 12-ni dormahako gital pay scale-o aro GHADC-ni secretary-ko dingtangatchinasa dabie kamtangtangko ka·na jechakangkuaha,” ine Marak parakataha.
Deputy CEM-ni parakatani gitade, GHADC-o kam ka·enggiparangna gital EC ka·sachakenba, salgittamni gisepo kam ka·pilchina ge·etanikoba ra·pilaha aro re·anggipa May-ni 10 tarikoba uamangko okame agangriktaiahachim indiba ia changoba NGEA-ko mol·molanirang indinsa ong·gramaiahachim.
“GHADC-ni treasury-o tangka paisa dongsrangjaha aro GHADC-ni ning·o donggipa finance department-ni u·iatani gitade, treasury-o da·o gong 96,30,738/- tangkarangsan dongaiaha. GHADC-o kam ka·giparangna fourth Pay Commission-o pangchake jabongani dormahako on·na CEM ku·rachakaha aro uamangni dabienga gita Fifth Pay Commission-koba chinga GHADC-ni treasury-o tangka paisa dongkaljokon on·na ku·rachakengachim. Indiba uamang bilsisani dormahako Fifth Pay Commission-o pangchake on·china gitasa dabiskae, uamangni jingjengataniko ra·galpilna jechaktaiaha,” ine GHADC-ni deputy CEM parakataha.
