SHILLONG: Meghalaya a·doko ta·raken COVID-19 giproroengahani gimin a·doko songdongenggipa mande sakantikon Rapid Antigen Test (RAT)-chi porikka ra·e nina gita sorkari manchiangaha.
A·dokni Deputy Chief Minister Prestone Tynsong-ni parakatani gitade, Meghalaya a·dokoba obostarang namjabatrorobaengahani gimin sorkari, a·doko songdongenggipa mande sakantikon porikka ra·e nina manchiangaha aro porikka ra·e nianiko sorkari, Bristibar sal dipet a·bachengatnaba gnang.
Meghalaya a·doko kenchakna nangbatenggipa biaprangko sorkari seokenba, jolo songdongenggipa mande sakantikon porikka ra·e nianggen ineba Deputy Chief Minister parakataha.
Tynsong-ni parakatani gitade, a·dokni dingtang dingtang biaprango donggipa CHC, PHC aro sub centre-rangko namdapatna nangenga aro RAT-chi porikka ra·anian altubatgipa chol ong·ani gimin porikka ra·e nianio ASHA aro Anganwadi worker-rangkoba kamo donatgen.
East Khasi Hills a·jao COVID-19-ko man·giparang bilongbatengani gimin lockdown-ko ra·dodapangkugenma ine sing·on, obostarangko niroke sorkari ja·kuko de·anggen ine Tynsong parakataha.
Chu·gimik lockdown-ko ra·gatna nanganiona manderangko tarie dongchina gita didiangengon, hospital-rango manderangko sanna aro COVID-ko warachakna rake kamrangko ka·engoba a·doko mande sianirang batroroengaha ine Deputy Chief Minister parakataha.
COVID-19-ko warachakanio sorkari aro health department-ni dongimin niamrangko ja·rikchina gitaba ua a·doko songdongenggipa manderangko didiataha.
Manderangko porikka ra·e nianio songni nokni dilgiparangko bakrimchina gita sorkari mol·molanggen ineba Tynsong parakataha.
