TURA: Garo Hills-ni bang·bata biaprangon sports officer-rangko in-charge dake rakkiengani a·sel kal·susaanirango tang·dona gita man·jaenga aro kal·susaani kamrango neng·nikanirangko chagrongna nangenga ine Tura Garo Senior Citizens Forum (TGSCF) parakatenba, Tura-o ja·delbatsranggipa officer-ko District Sports Officer dake rakkienba, pilak a·jarangnan permanent ong·gipa sports officer-rangko on·china a·dok sorkariko didiataha.
Iani bidingo Sports & Youth Affairs Department-ni Commissioner & Secretary-na sedoatengon, Garo Hills-ni bang·bata district-rangon sports officer-rangko 2025 bilsion gipin a·jarangona ra·jitate, sports officer in-charge dakesa kamo donengani a·sel kamrangko ka·anio neng·nikanirangko chagrongna nangenga ine TGSCF-ni president parakatenba, Garo Hills-ni pilak a·jarangon District Sports Officer-rangko permanent ong·e rakkichina didiataha.
“Garo Hills-ni pilak a·jarangon permanent District Sports Officer-rangko songe on·genchimode ian kamrangko ka·anio nambatatna man·gen aro Department-ni miksongani baksana niamrangkoba nambate chu·sokatna man·gen,” ine TGSCF parakatenba, sorkarini niamrango pangchake, bangbang ong·e dongenggipa Garo Hills-ni pilak a·jarangon District Sports Officer-ni kamrangko gapatchinaba sorkariko didiataha.
Re·baenggipa 2027 bilsion National Games-ko a·doko ong·atengani gimin aro Tura songjinmara Garo Hills-ni skotong gita ong·engani gimin ja·delbatsranggipa officer-ko Tura-ni District Sports Officer dake songe on·chinaba TGSCF didiataha.
GH-na permanent sports officer-rangko on·china Senior Citizens didia
Date:
Share post:
