TURA: Meghalaya a·doko bilsi 18-oni bilsi 44 ong·gipa manderangko re·baenggipa May 14 tarikoni COVID tika su·gnok.
Iani bidingo social media gita jinmana u·iatengon, bilsi 18 batgiparangko tika su·na gita a·dok sorkari, pong 42,000 tikarangko bi·ataha aro ia tikarang Bristibar salo sokbagnok ine a·dokni Chief Minister Conrad K Sangma parakataha.
“Bilsi 18-oni bilsi 44 ong·gipa manderangko May 14 tarik dipet tika su·na a·bachenggnok ine parakatna anga kusi ong·a. A·dok sorkarini bi·atgipa pong 42,000 tikarang Bristibar salo sokbagnok. Tikarangko kenchakna nangbatenggipa a·jarangna on·atchenggen aro tika su·na gita program-ko Health department tarigen,” ine Budbar attamo, a·dokni Chief Minister parakataha.
Indake ong·engon, Meghalaya a·dokni bang·bata hospital-rangon COVID man·giparangna palangrang chu·ongjaengani gimin Shillong IIM-o ge 100 oxygen concentrator-rang baksa ge 300 palangrangko aro Umsawli-o ge 40 oxygen concentrator donggipa palangrang baksa ge 100 palangrangko tarisomanaha ineba Chief Minister parakataha.
Da·o dipet Meghalaya a·doko bilsi 45 batgimin manderangko tika su·ani 37 percent ba 38 percent gapengaha ine janapatengon, chol man·enggipa pilak manderangkon tika su·e ra·china gita Chief Minister didiataha.
Nokoni ong·katengon, Health department-ni dongimin niamrangko ja·rikchina gitaba Chief Minister didiataha.
