TURA: District council-ni secretary-ko a·dok sorkarini songe on·aniara Constitution-ni Sixth Schedule-o on·gimin niamrangko pe·ani gita ong·enga ine GHADC-ni Non-Gazetted Employees Association (NGEA) matnangatenba, GHADC-ni secretary-ko songanio dakchakaniko on·china gita a·dokni Governor Satya Pal Malik-na sedoataha.
Governor-na sedoatgipa chittio NGEA-ni parakatani gitade, District Council-ni Secretary-ko District Council-ni Chairman-sa seokna man·a aro seoka man·gipa Secretary-ara District Council-ni membor ong·na nangja ine Assam & Meghalaya Autonomous Districts (Constitution of District Council) Rules 1951-ni Rule 14-o tale janapani gnangchim. Ia apsan Constitution-ni Rule 15-ni bidingo janapatskaengon, District Council-ni kamna seokako man·gipa officer-rangna aro kam ka·giparangna Governor-ni skang ra·chakgimin niamo pangchake District Council-rang niamrangko tarina man·a ine janapani gnang ine NGEA-ni dilgiparang parakataha.
NGEA-ni parakatani gitade, Executive Committee-na Secretary donggen aro ia Secretary-ko Chief Executive Membor seokgen aro ua District Council-ni membor ong·na nangjawa ine Rule 19(2)-oba janapani gnangchim.
“Uni gimin GHADC-ni Service Rule ba Meghalaya Service Rule-ko ja·rike, Secretary-ko GHADC an·tangan seokna nanga,” ine NGEA dabiangenba, batanggimin somoirango a·dok sorkarirang, Executive Committee-ni Secretary-na a·dok civil service officer-rangko seoke watatenga aro ian ADC rules-ko pe·ani ong·enga ine talatangaha.
