SHILLONG: A·doko Covid-19 sabisi sajinmani a·sel lockdown ra·gatatani da·o sal 15 mang batangpilengon, a·doko hajira ka·e cha·giparang aro kangal cholgri manderang neng·nikanirangko chagrongna nangenga, indakoba neng·nikanio ga·akenggipa manderangna tangka paisa on·e dakchakani giminde Meghalaya Sorkario da·o dipet maming chanchiani dongkujaenga.
Meghalaya Sorkari da·sikkariode, neng·nikanio ga·akgipa hajira ka·e cha·giparangna aro chonchongipa pala simaniko dake cha·giparangna, lakgni mang ong·nasipilgipa manderangna Tg. 2100 kae on·e dakchakachim, indiba ia bilsiode sabisini a·sel lockdown-ko ra·gatatgenchimoba iandakgipa dakchakanirangko on·ani bidingo mamingkoba parakatanirang dongkuja.
Official saksa agana je a·dokni a·paloni re·bae hajira ka·e cha·gipa sak 2000 mang manderangni bidingo Labour Department sing·e sane nienga, indake da·o dipetode uamangko kam ka·atgiparangan uamangna simsakanirangko on·enga ine ma·sina man·aha.
Official saksa indakeba aganaha je ia bilsini obostarangde da·sikkari baksa on·tisa dingtanggrika, Meghalaya-ni je manderangan gipin a·dokrango kamrangko ka·e cha·engachim, uamangko rimbapil·tokaha indiba ianchangode a·dokni a·palonirang Meghalayao bang·en donga.
Indake ong·engon, Supreme Court-ni rai on·gipao pangchakenba Meghalayani a·paloni re·bae kam ka·e cha·giparangna simsakanirangko on·enga ine official aganaha.
