SHILLONG: India a·songni Prime Minister Narendra Modi, mni Sukrobar salni bako Meghalaya, Ri Bhoi district-ni saksa an·tangni ge·e-game man·gipako bading-chiwalgipa nokgipa, chong·motan saksa entrepreneur baksa video conference gita mikkang nigrike golpoatenba uko de·mittelatengon, uan gipin game-sue cha·pagiparangna “namgipa dake mesokani” ong·eaha ine aganaha.
Centre’s Mission Organic Value Chain Development of North Eastern Region-o pangchake Eastern Ri Bhoi Organic Producer Company Ltd-ko bikotenba a·jao orgarnic farming-ni bidingo chu·sokgipa ong·anina uni CEO, Revistar Kharumnuid-ko prime minister, Modi de·mittelangaha.
Uamangni video conference gita mikkang nigrike golpoani somoio, Kharumnuid, farmer producer company-o bak dongpagipa gipin game-su·e cha·paenggiparangko aro uni an·tang game-ge·e man·gipa a·bani bosturangko bading-chiwalatna miksonganio kamrangko ka·engachim, uarangni bidingo Modi-na agan-talate on·angahaon, PM uni ja·ku de·anirangko namnikbeaha ineba koboro parakaha.
Uandake, prime minister, Karumnuid-ko uni a·baoniko man·enggipa bosturangko gipinchi palbadingatanikoba a·bachengatskachina didiatengon, ua PM-ni agan-ku·pattiatgipa kattarangko ra·chake, iarangko gipinchina ra·ange palbadingatgipa manderangni jako watatna a·bachengahaon a·jatango palbadingatana bate nambatgipa damrangko kraa gitan man·a ama ine aganaha.
Karumnuid-ni parakanni gitade, company-o da·o dipet, sak 500 game-ge·e cha·pagiparang bak donga aro uamangan, bang·bea re·ching, holdi aro uandakgipa gipin bosturangko a·bao ge·e-game man·atanichi angna dakchakaniko on·enga aro uarangko a·jatango palbadingatana agreba, Meghalaya a·doko an·tangtangni a·barango ge·e-game man·gipa bosturangko brena nangnikenggipa gipin a·songni manderangnaba palbadingatna man·skaa.
Kharumnuid-ni an·tang maikai kamrangko ka·engachim, uarangni bidingo agan-talatako prime minister namen namnikbeaha, “Kharumnuid dakgipa dingchike kam ka·gipa mandean, gipin game-su·e cha·pagiparangna nama dakmesokaniko on·enga. Ua an·tangni game-ge·e man·aoniko gipin kamrangna, jekai tangka-paisa man·gnina ba lapna bading-chiwalachi cholkoba dake ra·na man·skaa,” ineba PM uko de·mittele aganaga.
