SHILLONG: Covid-19 sabisi giproroaniko champengna, dongimin niamrangko ja·rikna nangako u·iatna mikkang antioni campaign ka·na sorkari tik ka·aha ine Deputy Chief Minister, Prestone Tynsong, Sonibar salo u·iataha.
Chanchirimna tom·a matchote kobor ra·timgiparang baksa agangrikmitingo, Tynsong indine aganaha, “Directorate of Information and Public Relation (DIPR)-ko a·dokni gimik bakrangon dingtang dingtang jolrang aro songadamrango campaign ka·na gita daitoko on·ataha.”
DIPR, publicity ba kan·dike tarigipa video-chi a·dokni manderangna covid-19-oni simsake dongna gita awareness-ko ba u·iataniko on·gen.
“A·dokni sakanti mandean an·tangtang simsakna gita nangenga. Ia somoio manderang an·tangtangni bewalrangko dingtangatna nangenga, maina ia somoio covid sabisiko champengna bilongen neng·enga,” ine Deputy Chief Minister aganaha.
Indake ong·engon sorkari chu·gimik lockdown-ko ra·gatna manchiengama ine kobor ra·timgiparangni sing·on, Tynsong indine aganchakaha, “chu·gimik ba bak dake lockdown ka·ani katta ong·ja, ia somoio manderang covid-ni obostako u·ina nangenga, manderang an·tangtangna simsakna a·bachengosa covid sabisi giproroako champengna man·gen.”
“Mikkangchi obosta namjabataona sokna sikja. Manderang nangchongmotja ong·ode, nokoni ong·katjaon namgen, noktangtango dongna gita nanggen,” ineba Chief Minister agandapaha.
Sorkarini champenganiko ra·gata somoinin police dolrangna, dos dakgipa ba niam pe·giparangni kosako ja·ku de·na bilko on·aha. Niam pe·gipani kosako rakgipa ja·kuko de·china sorkari, district administration-ko ge·etaha. Maina manderang niamko ja·rikjaenga uni gimin sorkari indakgipa rakgipa niamrangko donnaha. Uandake da·omangba sabisi giproroako champengna man·jaenga, maina manderang sorkarini dongimin niamrangko ja·rikja, ine Deputy CM aganaha.
