TURA: Salgittamna skang, Pelga Dareo gimagipa mande saksani manggisiko Robibar pringo, ia dare ka·mao donggipa Ganol chibimaoniko man·pilaha ine kobor on·aha.
Kobor on·ani gitade, Tura Balading gittimoni bilsi 45 ong·gipa John Ch Marak, re·anggipa Bristibar salon milsi pena inenba Pelga Wariona nokoni ong·katangahachim indiba ua unsalonin noktangona sokbapiljaha.
Ia mandeni chio gimaani ja·man songni manderangni dakchakanichi, State Disaster Response Force (SDRF)-ni sipairang, salgittamna uko chioniko sandioba man·pilkujaengachim indiba Robibar pringo uni manggisiko Pelga warini ka·mao donggipa biap damsaoniko man·pilaha ine u·iataha.
“Ia mandeni manggisiko Banseng wari aro Do·mesal warini gisepo donggipa Ganol chibimaonikosa man·pileaha aro ian Pelga Dare-oni kilometre atamang chel·achim,” ine West Garo Hills a·jani SP MGR Kumar parakataha.
Batanggimin antirangonin mikkarang waengani a·sel, Garo Hills-ni bang·bata chibima aro chiringrangba da·o ta·rakna a·bachengengahachim aro uandaken ia mandeba rasong grie chi ta·rakgipa ga·ake gimana nangaha.
