SHILLONG: Shillong Civil Hospital-o a·bachengatna sienggipa oxygen plant-ko Robibar attamchibara a·dokni Chief Minister Conrad K Sangma nieaha aro ia oxygen plant-ko konta 24-ni gisepon a·bachenggnok ine parakataha.
Chief Minister-ni parakatani gitade, ia oxygen plant-o minute-prakon litre 270 oxygen-ko chipna man·gen aro ia oxygen plant-ko a·bachengatahaode komibeoba ge 25 palangrangna oxygen-ko chu·onga gitan on·na man·gnok.
Ia oxygen plant-ko nieani ja·mano a·dokni Chief Minister, Shillong Civil Hospital-o kam ka·enggiparang baksaba obostarangko nipiltaina gita tom·aniko ong·atangaha aro manderangni janggiko jokatna gita an·tangtangko on·kange kam ka·engani gimin hospital-ni doctor, nurse aro gipinrangkoba mittelpilangaha.
Meghalaya a·doko COVID-19 ta·raken batrikrikengani gimin sabisini giproroaniko champengna man·na gita district administration-ni dongimin niamrangko ja·rikchina gitaba ua a·doko songdongenggipa manderangko didiataha.
Meghalaya a·doko COVID-19-ko man·giparang batrororoengahani a·sel bang·bata hospital-rangon oxygen-rang chu·ongjaengahani gimin Shillong songjinmao oxygen plant damsako kulina man·genchimoba oxygen chu·onggijaniko namatna man·genchim ine adita salrangna skangsan a·dokni Deputy Chief Minister Prestone Tynsong-ba parakatahachim.
A·dokni Deputy Chief Minister Prestone Tynsong-ni parakatani gitade, Tura-o damsa, Jowai-o damsa aro Shillong-o damgittam oxygen plant-rangko kulina ma·mong sorkari tangka paisarangko chame on·atahachim.
