TURA: South Garo Hills a·jao damsa manderangni rona namnikgipa aro picnic cha·ronggipa Patijora dareko Digranggre songni chadamberang Sonibar salo jinma rongtalataha.
Ia biapona rona aro picnic cha·na re·angenggipa manderang, ia biapo skatang ma·manti jabolrangko aro botolrangko gale donbaengani a·sel ia nitobegipa darena ong·sianikosan ra·baani ong·jaenga aro chio donggipa na·tok na·batrangnaba namgijaniko ra·baani ong·enga ine nikenba, Digranggre songni chadamberang, ia Patjora dareko jinma rongtalattokaha.
Indake ong·engon, mikkangchi ia biapona rona re·baenggipa aro picnic cha·enggipa manderang skatang jabolrangko galna man·jawa aro chio donggipa na·tok na·batrangko skatang rim·na man·jawa ine Digranggre songni chadamberang mikrakataniko on·angaha.
“Ia biapba A·chik a·songo damsa mingsinggipa aro rona rotogipa biap ong·a aro iandakgipa biapko rongtal an·tale rakkianiara nang·ni angni daitoan ong·a. Uni gimin ia biapona rona ba picnic cha·na re·baenggipa manderangko skatang jabolrangko gale donangjachina, na·tok na·batrangko skatang rim·jachina aro chingni dongimin niamrangko manipachina chinga mol·molatenga,” ine Digranggre songni chadamberang parakataha.
Ia biapona re·baenggipa manderang churing chupeke ma·manti jabolrangko galanggenchimode aro songni dongimin niamrangko manijagenchimode rakgipa ja·kurangko de·anggen ineba Digranggre songni chadamberang mikrakataniko on·angaha.
