TURA: Meghalaya a·doko aro mongsongbate West Garo Hills a·jaoba COVID-19-ko man·giparang ta·raken batrorobaengani gimin sabisini giproroaniko champengna gita May 17 tarikoni re·baenggipa May 24 tarikona gital niamrangko ra·gatangaha ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, ia salrango West Garo Hills a·jani ning·o donggipa pilak skul, college, training institute aro uandakgipa skie on·chakram biaprangko chipe donangkugen indiba ia salrango internet gita class-rangko ra·skana man·gen.
Ia salrango toromni gita, songsalni gita ba uandake jinma tom·anirangko ong·atna man·jawa indiba mande siani aro bia ka·anirangode DC office-oniko permission ra·chengenba sak 15-na batgija tom·na man·gen.
Ia salrango gipin a·dok ba biaprangoni manderang napbana man·kujawa aro pilak tourist spot-rang baksana border haat aro antio changprak kuligipa bazar-rangkoba chipe donangkugen.
Nangchongmotgipa kamrangko ka·enggipa office-rangna agrede ia salrango pilak private office-rangkoba chipe donangkugen aro central government-ni office-rangkoba chipe manderang noktangtangoni kamrangko ka·skana man·gen ine DC u·iataha.
Manderangko salruragipa garirangna dongimin niamrangni gimin janapatengon, a·bachengo District Transport Officer-ni u·iatgimin gita manderangko bakbrioni baksana bate gatna man·jawa ine DC u·iataha.
Ia salrango DC office-ni on·gimin pass-rangko man·e nangchongmota kamrangna re·ruraenggiparangna agrede a·dok damsaoni damgipinona aro a·ja damsaoni damgipinona re·rurana man·jawa ineba DC u·iataha.
Manderangni nangchongmotgipa bosturangko palenggipa dokkanrangko Tura Municipal Board-ni dongimin niam gita pring 8:00 bajioni salni 1:00 bajionasan kulina man·gnok. Hardware, electrical, computer service, mobile tarigipa, gari tarigipa aro uandakgipa dokkanrangko Mongolbar aro Bristibar salrangosan pring 8:00 bajioni salni 1:00 bajiona kulina on·gen aro nangchongmota ong·gijagipa gipin dokkanrangkoba Mongolbar aro Bristibar salrangosan pring 8:00 bajioni salni 1:00 bajiona kulina man·gen ine DC u·iataha.
Deputy Commissioner-ni u·iatani gitade, korosrangko ka·engon, manderang dokkan ning·o napna man·jawa aro dokkano dongtimgiparangan niamrangko nirokna nanggen.
Tura bazar-o dokkan dakenggiparangna u·iataniko on·angengon, manderangni nangchongmotgipa bosturangko palenggipa dokkanrangsan odd-even nomboro pangchake pring 8:00 bajioni salni 1:00 bajiona kulina man·gen indiba ramasamrango dokkan dakgiparangde kulina man·jawa ine DC u·iataha.
Assam a·dokni sima ari jolo donggipa Singimari-oni Tikrikilla-onade nangchongmotgipa dokkanrangko salantian pring 8:00 bajioni 12:00 bajiona kulina man·gen indiba nangchongmota ong·gijagipa dokkanrangkode Mongolbar aro Bristibar salrangosan pring 8:00 bajioni salni 12:00 bajiona kulina man·aigen ine Deputy Commissioner u·iataha.
Sonibar aro Robibar salode chu·gimik lockdown ong·angkugen indiba ia salrango nangchongmota bosturangko salbaenggipa garirangkode watgen ineba DC u·iataha.
Kam nangchongmotana nokoni ong·katengon, mask-rangko ganjringchina, saksa sakgipinoni chel·tangrike dongchina aro rongtal an·talaniko rakkichina gitaba DC u·iataha.
Mande jinmani biaprango aro kam ka·chakram biaprango skatang stujachina aro ta·makkurangko jakkaljachina gitaba DC mikrakataniko on·angaha.
Sorkarini dongimin niamrangko pe·genchimode Epidemic Disease Act 1897-ni Section 2-ni ning·o on·gimin bilrango pangchake dongimin officer-rang, ja·kurangko de·anggen ineba DC mikrakataha.
Curfew-ni somoio police-rang, fire & emergency service, medical, MeECL, PHE, PWD, Press aro uandake nangchongmotgipa kamrangko ka·enggipa dolrangkode champengani dongjawa ine DC u·iataha.
