TURA: South Garo Hills a·jani Baghmara-o donggipa MePDCL sub-station-ko chu·gimik divisional office-ona ra·doatchina dabie Garo Students Union (GSU) Mindikgre regional unit, a·dokni Chief Minister Conrad K Sangma-na sedoataha.
Iani bidingo a·dokni chief minister-na sedoatengon, Baghmara-o MePDCL-ni sub-divisional office-ko 1992 bilsion songahaoba da·alonan maming namroro silroroaniko nikna man·kujaenga aro ia sub-station-o kam ka·giparangba chu·onga gita dongja ine GSU Mindikgre unit-ni president Greneth M Sangma parakataha.
“Ia South Garo Hills sub-division-ko SDO saksachi aro linemen sak 8-chisa chalaienga aro ia sub-station-o gari gorarangba dongjani a·selan je kam ka·giparangde re·rurae kamrangko ka·na man·tokjaenga,” ine Sangma parakataha.
Ia sub-divisional office-o kam ka·giparang chu·ongjani a·sel aro gari gorarang dongjani a·selan badiaba line-rango nosto ong·genchimoba songgimikan bijoli gri ong·e dongna nangrongenga ineba GSU Mindikgre unit-ni president parakataha.
Indake ong·engon, South Garo Hills a·jani dingtang dingtang biaprango manderangni nangani kri bijoliko on·na man·na gita Mindikgre, Erenggre, Karukol, Panda aro uandakgipa mongsonggipa biaprango kam nanggitikan somoirangona komibeoba lineman sakprakko on·china gita GSU dabiangaha.