SHILLONG: COVID-19-ni a·sel Meghalaya a·dokoba a·songni gipin biaprango gitan tangka paisana neng·nikanirangko chagrongna nangengaha ine a·dokni Chief Minister Conrad K Sangma parakataha.
Chief Minister-ni parakatani gitade, COVID-19-ko warachakanio a·dok sorkari gong kror 400-na baten koros ka·na nangengaha indiba ia changode skanggipa chango gita koros ong·janaba gnang.
Re·anggipa bilsini September jaona kingking COVID-19-ko warachakanio sorkari gong kror 399 tangkarangko koros ka·na nangaha ine a·kangahachim aro iana dingtang dingtang NGO-rang aro opposition dolba a·dok sorkariko matnangtokahachim.
COVID-19 gipchengani somoio indita tangkarangko koros ka·na nangahani gimin Sombar salo a·dokni Chief Minister talataniko on·angskaengon, ua somoio rang·gitik obosta ong·e sorkari mamingkon dakna somoi man·jaha aro re·anggipa bilsio gipin biaprangoni re·bapilenggiparangna, hotel-rango donggiparangna, labour-rangna, doctor-rangna aro dingtang dingtang program-rangko ong·atna gitaba sorkari bang·en tangka paisarangko koros ka·na nangaha ine parakataha.
“Ia bilsiode chinga maiko dakode tangka paisarangko nambate jakkalna man·gen aro maikai manderangna an·seng baljokaniko on·na man·gen, uarangni gimin chanchisoe kamko ka·na man·aha,” ine Sangma parakatenba, a·doko songdongenggipa manderangna tikarangko su·anio sorkari gong kror 100-ko koros ka·na tik ka·manaha ine talatangaha.