SHILLONG: Meghalayao salsabatbat COVID sabisiko man·giparang bang·rikrikengon, Meghalaya Chief Minister, Conrad Sangma indake aganaha je champengatani aro lockdown-ko ra·gatatjagenchimode Shillongo, COVID-ni obostarang namjabatkunaba dongachim. Indake pilak obostarangko nigrike sorkari raken kamrangko ka·enga ine Pa Sangma aganaha.
A·doko Mongolbaronade active case 5000 gapaignok ine sing·anina aganchakengon, sabisini giproroaniko champengna gitan Sorkari niamrangko rakbatataha ine Chief Minister, Conrad Sangma aganaha.
“Seng·gnange da·o gita chamepnganirangko ra·gatatjagenchimode obostarang da·ona bateba namjabatnaba dongachim,” Chief Minister aganaha.
Re·anggipa May 1 tarikonin East Khasi Hills-o champenganirangko ra·gatatgenchimoba district-o covid man·giparang da·alonaba komikujaenga ine nikna man·enga.
Sorkari manderangna mikrakatatni programrangko ong·atanggen, da·odipetode champengataniko dakatanisan, sabisiko komiatani chol ong·aia ineba CM aganaha.
Pa Sangma indakeba aganaha je Meghalayao re·anggipa jao 60000 test-rangko ka·aha, ia jao 70000-80000 test-rangko ka·na gita Sorkari nisan ka·enga.
Iarang baksana, oxygen dongchapgipa palangrangkoba ge 350 oniko ge 700-ona sorkari bang·dapatna man·engaha aro mikkang antignini gisepo Sorkari ge 1000-ona baridapatgen, Pa Sangma aganaha.
A·doko ge 700 mang oxygen cylinder-rang donga aro Sorkari ru·utgijan ia oxygen cylinder-rangkoba ge 1500 gapatgen, ua aganaha.
Chief Minister-ni aganani gitade, Shillong Civil Hospital, Ganesh Das aro RPCH Hospital-rango ru·utgijan oxygen plant donggnok aro apsankon Tura, Jowai aro Nongpoh Civil Hospital-rangoba antisani gisepon donggnok.
Sorkari, dingtang dingtang gittimrango Corona Care Centre-rangko donna miksongenga, iarangna agreba, IIM-o ge 300 aro NIFT aro MATI-o ge 100 prak palangrangko tarina ja·ku de·engjok aro uarangni 50 precent palangrangde oxygen dongchapgipa ong·gen.
