TURA: Garo Hills-ni badiaba badiaba biaprango bilakbegipa bijolini transformer-rangko maming peng·ani gri aro kaduulani gri donengani a·sel manderangnasan ong·aigija matchu matterangnaba kenchakna nangani ong·engani gimin bijolini transformer-rangko simsakbate aro naljokate donchina Niksamso A·chik Society (NAS), MeECL-ni official-rangko didiataha.
Niksamso A·chik Society-ni general secretary Tengrak R Marak-ni parakatani gitade, Garo Hills-ni bang·bata biaprangon bilakbegipa bijolini transformer-rangko maming peng·ani aro kaduulani gri donani a·selan batanggimin somoirangoba matchu matterangsan ong·aigija manderangni bijoli nange sianirangko nikna man·ahachim aro adita salrangna skangba, East Garo Hills a·jani Williamnagar-o donggipa Cherangre jolo me·chik bi·sa saksani bijoli nange signioniko rasong gnangesa jokatna man·ahachim.
“Bilakbegipa bijolini transformer-rangko songani somoio MeECL-ni manderang, transformer-rangko kapenge ba kaduule donrongjani a·selan iandakgipa a·sel ong·anirangko Garo Hills-o bang·en nikna man·aha. Uni gimin mikkangchi manderangni aro matburingrangni namgninaba transformer-rangko nanga gita kapenge naljokao donna nangchongmota,” ine NAS-ni general secretary parakataha.
Indake ong·engon, manderangni nokrango metre box-rangko dongija skatang kajinarangko ra·enga ineba Niksamso A·chik Society, MeECL-ko matnangataha aro manderang an·tangtangni bijoli jakkalani kri kajinarangko gamna man·na gita nokantion metre box-rangko on·piltaichina didiataha.