TURA: West Garo Hills a·jaoba COVID-19 ta·raken giproroengani gimin sabisini batrikrikaniko champengna gita niamrangko donatahaoba ia niamrangko manitokjaengani gimin Tura Super Market-o bite aro me·su samjakrangko palenggipa dokkanrang baksana Tura Super Market-ni wilwilao me·su palenggiparangkoba chipe donchina West Garo Hills a·jani Deputy Commissioner ge·etaniko on·ataha.
West Garo Hills a·jao aro mongsongbate Tura jillao COVID-19-ko man·giparang batroroengahani gimin Tura Bazar aro Tura Super Market-o dokkan dakenggiparangko pring 8:00 bajioni attam 1:00 bajiona kulina on·angenba, dokkanrango niamrangko ja·rikchina gita Deputy Commissioner ge·etaniko on·ahachim. Indake ong·genchimoba, Tura Super Market-o aro Tura Super Market-ni wilwilao bite aro me·su samjakrangko palenggipa dokkanrango COVID-19-ko warachakna dongimin niamrang, jekai saksa sakgipinoni chel·tanggrike dongani aro gipin niamrangko ja·riktokjaenga ine nikenba, ia biaprango bite aro me·su palgiparangko chipe donchina ge·etaniko on·ataha.
Iani bidingo market committee baksa agangrikenba, ia biapo bite aro me·su samjakrangko palenggiparangko Tura jillani dingtang biapona apjitangskachina gitaba Deputy Commissioner, Tura Municipal Board-ni chief executive officer-na ge·etaniko on·ataha.