TURA: Mongolbar salo Williamnagar-ni mongsonggipa bazar-o dokkan dakenggiparangko random test ba porikka ra·e nianio gimik sakchet manderang positive ong·aha ine kobor on·aha.
East Garo Hills a·jani Deputy Commissioner Swapnil Tembe-ni u·iatani gitade, East Garo Hills a·jaoba COVID-19-ko man·giparang batrorobaengani gimin Mongolbar salo, Williamnagar bazar-o dokkan dakenggiparangko porikka ra·e niangaha aro gimik sak 142 manderangko porikka ra·e niaoni sakchet manderang positive ong·aha.
“Da·al chinga Williamnagar main market-o dokkan dakenggiparangko porikka ra·e niaha aro porikka ra·e nigipa sak 142-oni sakchetde positive ong·aha. Bazar antirangona koros ka·na re·baengon an·tangtangko naljoke rakkina man·na gita niamrangko ja·rikchina chinga mol·molatenga,” ine Mongolbar salo, East Garo Hills a·jani Deputy Commissioner, social media-o parakataha.
Nokoni ong·katengon, mask-rangko ganchina aro chol man·enggipa manderang pilakon COVID-ni tikarangko su·e ra·china gitaba Deputy Commissioner didiataha.
Indake ong·engon, COVID-19-ni batrikrikaniko champengna East Garo Hills a·jao Budbar sal dipet niamrangko rakbatatgnok ineba Deputy Commissioner parakataha.
