TURA: COVID-19-ni giproroaniko warachakna dongimin niamrangko manitokjaengani gimin Tura Nakam Bazar-o be·en, na·tok aro uandake manderangni nangchongmota ong·gijagipa bosturangko palenggipa pilak dokkanrangkon district administration, Budbar sal dipet chipe donatchengaha.
West Garo Hills a·jao aro mongsongbate Tura jillao COVID-19-ko man·giparang batroroengahani gimin Tura Bazar aro Tura Super Market-o dokkan dakenggiparangko pring 8:00 bajioni attam 1:00 bajiona kulina on·angenba, dokkanrango niamrangko ja·rikchina gita Deputy Commissioner ge·etaniko on·ahachim. Indake ong·genchimoba, Tura Nakam Bazar-ni wilwilao be·en aro na·tokrangko palenggipa dokkanrango COVID-19-ko warachakna dongimin niamrang, jekai saksa sakgipinoni chel·tanggrike dongani aro gipin niamrangko ja·riktokjaenga ine nikenba, ia biaprango be·en aro na·tok palgiparangko chipe donchina ge·etaniko on·ataha.
Iani bidingo market committee baksa agangrikenba, ia biapo be·en aro na·tok palenggiparangko Tura jillani dingtang biapona apjitangskachina gitaba Deputy Commissioner, Tura Municipal Board-ni chief executive officer-na ge·etaniko on·ataha.