TURA: Tura-ni Modynagar gittimo baditaba sak COVID-19 man·ahani gimin manderangni re·ruraaniko champengna gita micro containment zone dakataha ine West Garo Hills a·jani Deputy Commissioner u·iataha.
Modynagar gittimko micro containment zone dakatahani gimin ia gittimni ning·o songdongenggipa manderang gittimtangoni ong·katna man·jawa aro gipin biaprangoni manderangba ia gittimona re·angna man·jawa ine DC u·iataha.
Ia gittimko containment zone dakenga dipet maming program-rangko ba tom·bimonganirangko ia gittimo ong·atna man·jawa ineba DC u·iataha.
Modynagar gittimo donggipa pilak dokkanrang, skulrang aro office-rangkoba chipe donna nanggen aro manderangna nangchongmotgipa bosturangko district administration-ni seokgimin dolrang, sokate on·skagen.