TURA: COVID-19 giproroengmiting somoio manderangna nambate sanna bananirangko on·na aro nirok sandianiko on·na man·na gita Williamnagar Civil Hospital-na chu·ongjaenggipa bosturangko on·china aro kam ka·giparangko chu·onga gita on·dapchina Williamnagar-ni MDC Alphonsush Marak, a·dokni Chief Minister Conrad K Sangma-ko didiataha.
Iani bidingo a·dokni Chief Minister-na sedoatengon, Williamnagar Civil Hospital-o chu·onga gita sam aro gipin sanna banani cholrang baksana bosturangba chu·ongjaengani a·sel manderangko sanna bananio neng·nikanirangko chagrongna nangenga ine Williamnagar-ni MDC parakataha.
“Ia hospital-o da·o dipet ventilator ge 2 aro B Type Oxygen cylinder ge 14-san dongengpiti aro iandake sabisirang giproroengmiting somoirangode iarangara hospital-na chu·ongjaenga. COVID-19 ward-o palang ge 30-san dongaia aro ia ge 30-oni ge 6-ko Intensive Care Unit (ICU)-o, ge 2-ko maternity ward-o aro bangki ge 22 palangrangkode me·a aro me·chikrangni general ward-na jakkalenga,” ine Marak parakataha.
Williamnagar MDC-ni parakatani gitade, ia hospital-o nurse-rang aro gari saltimgiparangba chu·ongjaengan baksana COVID-19-na jakkalna ambulance-ba dongkujae da·o gita obosta namjabatroroengmiting somoio bang·a neng·nikanirangko chagrongna nangao ga·akengachim.
“”Williamnagar civil hospital-o nurse-rang chu·ongjaengan baksana ambulance-ko salgipa driver-ba sakgnisan dongaia aro ia driver-rangan COVID aro COVID ong·gijagipa case-rangoba kamrangko ka·tokna nangenga,” ine Marak talatangenba, ia hospital-na ta·raken nurse aro driver-rangko on·dapchina chief minister-ko didiataha.
Marak-ni parakatani gitade, Williamnagar civil hospital-o Ultra sonography machine donggenchimoba da·onan radiologist dongkujani a·sel manderang Tura aro gipin biaprangonasa re·ange sonography-rangko dakna nangtokenga aro apsan daken ia hospital-o anaesthetist aro orthopaedist-rangba dongkujaenga.
“Uni gimin da·o gita COVID giproroengmiting somoio ia hospital-na pilak nangchongmotenggipa sanna banani cholrangko on·china anga sorkariko mol·molenga,” ine Williamnagar-ni MDC parakataha.