TURA: Garo Hills gimikon COVID-19-ko man·giparang batrorobaengani gimin West Garo Hills a·jao Sukrobar attamoni June 1 tarik pringona kingking chu·gimik curfew-ko ra·gatangahaon, Garo Hills-ni dambri a·jarangoba Sonibar aro Robibar salgnina chu·gimik lockdown-ko ra·gatangtaiaha.
Salgnina ong·atenggipa lockdown-ko Garo Hills-ni bang·bata biaprangon Sukrobar attam 8:00 bajioni Sombar pring 5:00 bajiona ra·gatangtaiaha aro ia lockdown-ko ong·atanio manderangko skatang nokoni ong·katjachina gita sorkari mikrakataha.
Ia salgnina ong·atenggipa lockdown-o sam dokkanrangna agrede pilak dokkanrangkon chipe donangkuna nanggen aro gari gorangba skatang re·rurana man·jawa.
Ia salgnina lockdown-ko ra·gatanio cha dokkan ba restaurant-rangkoba chipe donna nanggen indiba nokrangona sokate on·gipa restaurant ba dokkanrangde, cha·anirangko tarie nokrangona sokate on·skana man·gen.