SHILLONG: Meghalayao da·sikkari gita ong·gija ia bilsiode mongsonggipa cha·ani ringani aro me·su samjakrang a·doko chu·onga gitan donga.
Food aro Civil Supply department-oni paraka je nangchongmotgipa bosturangni damrangkoba salantian nirokatenga aro da·o dipetode bosturangko dam rake palani bidingo matnangdoanirang dongkujaenga.
Indake ong·genchimoba nanganirangni kri bosturangni sokbaanirang apsan ong·jaengani gimin bostuni damrang on·timintide dingtanggen ine official aganaha.
Nangchongmotgipa bosturangni damrang tang·dojana gita pilak district-rangon District price monitoring Committee nirokjringenga, a·doko nangchongmotgipa bosturang bon·changna jajrengani dongja, maina lockdown ka·nasusu dakon wholesale dokkan dakgiparang bosturangko chu·onga gitan chimongsotokaha ineba official aganaha.
Unomitingo official indakeba mikrakataha je sakoba dam bate palako aro dam bate palsrukanirangko District Price Monitoring team, rim·a man·genchimode uamangni kosako bichal ka·gen.
“Nangchongmotgipa bosturang chingo chu·onga gitan donga” ine agana baksa NFSA-ni bosturangba FCI godown-oni bang·bata biaprangonan sokangengaha ineba official aganaha.
Indakeba nikatna man·gen je a·dokni lak 21.5 manderang, uamangni man·rongana bate May aro June jaode Ma·mongni on·dapatgipa merongrangko NFSA-ni gita man·dapkugen.
NFSA-ni merongko man·giparang, jemangan kg prako 3 kae merongrangko man·engachim, ia May aro June jagniode sakprako kg bonga kae merongrangko indin man·dapgen.
