Bilsi 45 batgiparang COVID tika su·na gong·tokjaenga

SHILLONG: Meghalayao bilsi 18 batgiparang COVID tika su·na gita gisik nangtokgenchimoba, Meghalaya Sorkari, bilsi 45 batgiparangna jakkalna dongipa tikarangkode uamangna jakkalna chanchiskajaenga, jeon bilsi bregiminrangni tika su·na gisiko nangjani giminde Sorkari suk ong·skajaengachim.
Koborogita, bilsi 45 batgiparangde COVID tikarangko su·na gita re·baani namen komiengachim.
Indake ong·genchimoba bilsi 18 batgiparangde a·doko da·odipet namen gisiko nangenga, jeon COWIN-ko kuliani bang·gija kontani gisepon tika su·na biming segatgiparang gapjolaianichi iani sakkiko ma·sina man·enga.
A·doko, bilsi 45 batgiparang tika su·na simsaktokjaengani gimin uamangna chamgipa tikarangko bilsi 18 batgiparangna jakkalskagena Sorkario maiba miksongani dongama ine sing·anina aganchakengon, bilsi 45 batgiparang jemangan tikarangko su·ahachim, uamangna aro healthcare worker-rangna aro frontline worker-rang gnigipa su·na nanggipana donna nangskaenga ine health department-ni official saksa aganaha.
“Ian India sorkarini chamatgipa ong·ani gimin tikarangko jakkalanio niamko namen ja·rikna ga·aka,”  official agandapaha.
A·doko bilsi 45 batgiparang da·o dipet sak 85000 mang tikarangko su·aha aro bilsi 18 batgiparangoni sak 13000 mang Covid tikarangko su·aha.
Indake ong·engon, sorkari manderangko tika su·atna jotton ka·stapomangba bilsi 60 batgiparangde da·alonaba tikarangko su·na gita jechakgipan batengkua.
Unomitingo, 18-44 dolni manderangde Sonibar Robibaro 100% manderang tikkarangko su·angaha.