SHILLONG: Batanggimin bilsionin a·doko COVID-19 sabisi sajinmachi sinjetaniko man·engon, Meghalayao doctor aro nurse-rang neng·tak neng·rakpilgija bilni nalsao ong·pile sabisiko dakgrikchakna kamrangko ka·enga jemangan nangana batpile baljrimanirangko chagrongenga.
Da·omiting somoio health worker-rangna namen baljrimbatenga, NEIGRIHMS Director, Dr P Bhattacharya-ni aganani gitade, ia hospital mangmangonin sak 125-na baptpilgipa health care worker 125 covid sabisiko man·aha.
NEIGRIHMS-ni skotong indakeba aganaha je health worker-rangko da·ode konta 12-nade uamangni kamoniko neng·taksrokna on·aha, maina PPE-rangko gankame kam ka·aniara uamangna altugipa kam ong·ja.
Unigisepon, “hospitalo chu·onga gita staff-rang dongode bal bojarang aditade ritchenggenchim” ine aganan baksa ia sabisini a·selan mija mangmango chadambe staff nurse-ko gimaatna nangaha ine Bhattacharya aganaha.
Unomitingo COVID-19 sabisiko dakgrikchakanio da·omanchade doctor aro nurse-rang namen neng·skimenga ine Shillong Civil Hospital medical superintendent Dr Andreas Dkhar aganaha.
“Chinga kam ka·giparangko bi·dapaha aro aditade man·aha indiba adita nangdape nikengkua” ineba ua aganaha.
Salanti bang·a sagiparang nampile re·angoba uamangni biaprango attamon gappilaia ineba ua aganaha.
Minggipinara hospitalpo duty ong·gijagiparangba community care centre-rango donggiparangko nirokna nangskaenga. Community centre-rangko doctor saksa aro nurse sakgnisan nirokenga, unomitingo centre-rango donggiparangoni saoba saa bilongangode uamangko bakan hospital-ona sokatangenga, indake ia somoio chachaode doctor nurse-rangna namenchan neng·nikani ong·enga ine saksa sorkari doctor aganaha.
COVID sagiparangko sana bananiko dakmitingo mitam doctor aro nurse-rang uamangni janggirangko gimaataona sokaha. Unomitingo healthcare worker-rangna agre sinjetaniko ra·bajachina gita sorkariba skangon manderangna u·iatmanaha ineba nikatna man·a.
