Shillong: Meghalaya Chief Minister Conrad K. Sangma Mongolbaro Shillong songjinmani Ganesh Das Hospital aro Reid Provincial Chest Hospital-rangona re·angenba oxygen plant-rangko donani ba songdimani obostarangko nirokeaha.
Ia ge·gni hospitalrango oxygen bikotani plant-rangko songdimani korosrangna Prime Minister-ni Citizen Assistance aro Relief in Emergency Situations (PM CARES) Fund-ni gita chamataha.
Ganesh Das Hospital-o dongipa Oxygen Plant, 400 LPM-ko bikotna man·gen aro High Flow Oxygen ba bilake oxygen-ko watoba komibeoba ge 40 palangnade chu·onggen. Unomitingo RP Chest Hospital-o donggipa Oxygen plant-ba 300 LPM oxygen-ko bikotna man·gen indake oxygen-ko bilake jakkalgenchimoba komibeoba ge 30 a·damrangnade chu·onggen ine Chief Minister Conrad Sangma aganaha.
Ia ge·gni hospitalrango Oxygen plant-rangko donna kam ka·anirangko Chief Minister chu·ongnike aganaha aro RP Chest Hospital-o dongipa oxygen plant-ko salgni mangni gisepon jakkalna man·aigenok ineba Pa Sangma aganaha.
Unomitingo Ganesh Das Hospital-o dongipa oxygen plant-kode jakkalengaha ineba ua aganaha.
Indake a·dok gimikon dingtang dingtang biaprango oxygen oxygen plant-rangko donroroangengaha ineba Chief Minister aganaha.
‘Oxygen plant-rangko donna gita kam ka·engon pilak kamrangkon somoi gita matchotatna man·na gita chinga nirokenga indake pilak dak rikanirangan da·o tiktak ong·angtokengaha aro a·sel nangaona tarie donengaha’, Chief Minister aganaha.
Indake hospitalrangona re·ange nirokeani somoio, Chief Minister, ia ge·gni hospitalni doctor aro medical team-ni manderang baksa hospiltani obosta aro kam ka·giparangni bidingoba agangrikaha.
