SHILLONG: Meghalaya a·doko Corona care centre-rangko kulidapenba, COVID-19 positive ong·e noktangtango dingtang nape dongenggiparangko corona centre-rango donatskana sorkari miksongengoba ian altua kam ong·jawa maina a·doko COVID man·gipa manderangoni bang·batan da·o noktangtango dongesa sannaniko ra·enga ine nikna man·a.
Sorkarini see rakkianiko parakani gitade, Meghalaya a·doko COVID man·e dongenggipa gimik sak 7971-oni sak 6670 manderangde noktangtangon dingtang nape dongtokenga aro sak 1301-san corona centre-rango donge sannaniko ra·tokengachim.
East Khasi Hills a·jao COVID man·gipa manderangoniba sak 3234-de noktangtangosa dingtang nape dongtokenga aro sak 1025-san dingtang dingtang quarantine centre aro gipin hospital-rango donge sannaniko ra·engachim.
Apsan daken Ri Bhoi a·jaoba COVID man·e dongenggiparangoni sak 1285-de noktangtangosa nape dongtokenga aro sak 27-san corona centre-rango dongskaengachim.
West Garo Hills a·jaoba sak 508-de noktangtangon dingtang nape dongtokenga aro sak 62-san corona ba quarantine centre-rango dongtokenga. West Jaintia Hills a·jaoba COVID positive ong·gipa manderangoni sak 506-de noktangtangon nape dongenga aro sak 56-san quarantine centre-rango aro hospital-rango donge sannaniko ra·skaenga.
COVID man·gipa manderangko sorkarini corona care centre-rango donani pal noktangtango donna gita sorkarini tik ka·aniko iana skang a·doko songdongenggipa bang·a manderangan jegaltokahachim.
Indake ong·genchimoba bang·bata hospital-rangon, mongsongbate Shillong songjinmani hospital-rango manderang chakpiljaengani gimin community corona care centre-rangko kulina gita a·dok sorkari, dingtang dingtang song ba gittim aro dolrangko didiangskaaha.