SHILLONG: A·doko COVID-19 sabisi sajinma bilongengmiting somoio, a·dokni bang·a kangal cholgri nokdangrangan uamangni nokdangni mandeko aro bakdilrangko private hospitalrango sana bananiko dakanio namen neng·nikanirangko man·enga aro COVID sagiparangko chu·gimikan MHIS-chi sananiko dakchina gita dabiengon, Sorkari iani bidingo tom·e chanchirimangaha.
Tom·ani ja·mano koborni manderangna aganengon, bang·a manderangan neng·nikanirangko chagrongengani gimin ia neng·nikanirangko namatna gita sorkari salgnini gisepon kamrangko ka·gen ine a·dokni Health Minister, AL Hek aganaha.
MHIS state manager Sonata Dkhar agana je da·o dipet, MHIS-ni ning·o Shillongo, private hospitalrango COVID-19 sabisiko sana bananiko dakgiparang sak 866 ong·aha aro COVID-19 test ka·giparang 4099 ong·aha.
COVID-19 sagiparangko sanna gita ia MHIS-ni ning·o kror 2.11 tangkarangko chamaha aro COVID-19 test ka·na gita lak 739. 5 tangkarangko chamanaha.
A·dokni pilak private aro sorkari hospitalrangon COVID-19 sagiparangko sana banani korosko gamna gita dingtangmancha scheme-ko ra·gatchina unaskango Federation of Khasi Jaiñtia aro Garo People (FKJGP), Chief Minister-ko mol·molahachim.
Ia COVID-19ni obostao mitam private hospitalrang an·tangtangna lapna dakna rikenga ine FKJGP aganaha. Uni a·selan mitam COVID-19 man·gipa nokdangrangde korosrangna kenen, test ka·na aro sannaniko dakna re·na neng·niktokenga, Federation aganaha.
