TURA: Garo Hills Autonomous District Council (GHADC)-o kam ka·enggipa manderang bilsi gittam ong·na sipile dormaharangko man·jae neng·nikanirangko chagrongna nangtokengani gimin kam ka·giparangna gital pay scale-o chu·gimik dormaharangko on·china aro GHADC-o so·sojengjeng ong·aniko bon·atchina gita Association for Democracy & Empowerment (ADE), a·dokni Chief Minister Conrad K Sangma-ko didiataha.
“Indita bilsini dormaharangko man·jae GHADC-o kam ka·enggiparang badita duk saknaaniko chakna nangenga chinga ma·sienga aro chinga ADE dolba uamangna chakpaaniko on·enga. Nokdangko chalaienggipa ja 34-ni dormaharangko man·jagenchimode uni nokdango badita neng·nikanirangko man·enggen an·ching pilakan chanchiate nina man·a. Uni gimin GHADC-o kam ka·enggiparangni man·na nangkuenggipa ja 34-ni dormaharangko gital pay scale-o on·e uamangni neng·nikanirangko namatchina chinga chief minister-ko didienga,” ine ADE-ni general secretary Supam R Marak parakataha.
A·gilsak gimikon da·o bilsisa batpile COVID giproroenganichi manderang neng·nikanirangko man·engmiting somoio GHADC-o kam ka·enggiparangni dormaharangko on·gija donaniara kraani ong·ja ineba ADE parakataha.
“Uni gimin GHADC-o so·sojengjeng ong·aniko bon·atna gita kam ka·giparangna uamangni man·na nangenggipa dormaharangko gitcham executive committee-ni ku·rachakgimin gitan gital pay scale-o on·china chinga chief minister-ko mol·moltaienga,” ine Marak parakataha.