TURA: Association for Democracy & Empowerment (ADE)-ni gitcham president Dalseng Bira Ch Momin-ko ADE-ni president songpiltaichina ADE Resu aro Mendi regional unit, ADE headquarter-ni dilgiparangko didiataha.
ADE-ni gitcham president Dalseng Bira Ch Momin, kamtangko wate ia bilsini GHADC election-o Amongpara constituency-oni susaahachim indiba rasong grie ua chu·sokgipa ong·na man·jahachim.
Indake ong·engon, Momin-ni kamtangko watangani ja·man ADE-ko re·dilgipa dongjae, dingtang dingtang unit-rangko chalaianio skotong gri chalaiani gita ong·aha ine ADE Resu aro Mendi unit-ni general secretary Sandarjiman K Sangma parakatenba, Momin-ko ADE-ni president songpiltaichina gita ADE headquarter-ni dilgiparangko didiataha.
“Dalseng Momin, saksa A·chik a·songna an·tangko on·kange kam ka·gipa ong·a aro uni kam watangani ja·man chinga baditaba jarangna pagri gita ong·e pilak kamrangko ka·anio dontongna nanga gita ong·aha. Uni gimin ua dikdiksa politically re·anggenchimoba chingna aro North Garo Hills-nade Momin-ko nangchongmotenga,” ine ADE Resu aro Mendi unit-ni dilgiparang parakatenba, Momin-ko ta·raken ADE headquarter-ni president songpiltaichina didiataha.
