SHILLONG: Budbar saloni Bristibar salona konta 24-ni gisepo Meghalaya a·dok gimiko sak 808 manderang COVID-19 sabisiko man·dapaha aro ia apsan salon sak 12 manderang COVID-19 man·e siangdapaha.
Bristibar salo COVID-19 man·dapgipa sak 808 manderangko channe da·o Meghalaya a·dok gimiko COVID-19 man·e dongenggiparang gimik sak 8255 gapengaha aro COVID man·e sianggiparang gimik sak 524 gapangaha.
Bristibar salo positive ong·gipa sak 808 manderangoni sak 26-de East Garo Hills-o, sak 11-de East Jaintia Hills-o, sak 419-de East Khasi Hills-o, sak 9-de North Garo Hills-o, sak 46-de Ri Bhoi a·jao, sak 63-de South West Garo Hills-o, sak 17-de South West Khasi Hills-o, sak 59-de West Garo Hills-o, sak 50-de West Khasi Hills-o aro sak 108-de West Jaintia Hills a·jaoni ong·a.
Bristibar salo COVID man·e sianggipa sak 12 manderangoni sak 11-de East Khasi Hills-o aro sak 1-de West Jaintia Hills a·jaoni ong·a.
Ia apsan salon gimik sak 597 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba da·o gimikchide sak 24,325 gapangaha.
