SHILLONG: Meghalaya a·doko bilsi 18-oni bilsi 44 ong·gipa manderangko su·na ra·bagipa tikarang bon·changengahani a·sel bilsi 18 batgimin manderangna tika su·aniko dontongatchengna nangenga ine Health official-rang u·iataha.
Bilsi 18-oni bilsi 44 ong·gipa manderangko May 24 tarikoni May 30 tarikona tika su·na gita online registration-ko May 23 tarikoni a·bachengahachim indiba da·o tikarang bon·changengahani gimin bilsi 18-oni bilsi 44 ong·gipa manderangko tika su·na register ka·aniko dontongatchengaha ine official-rang u·iataha.
Official-rangni u·iatani gitade, Meghalaya a·dokosan ong·aigija bang·bata a·dokrangon tikarang bon·changtokengahani gimin bilsi 18-oni bilsi 44 ong·gipa manderangna tika su·aniko dontongchengna nangtokengahachim.
Indake ong·engon, COVID-19-ni tikarang da·o June jani gnigipa antimango a·dokona sokbatainaba gnang aro unosa bilsi 18 batgimin manderangko tika su·taina man·gnok ine a·dokni Health Minister AL Hek parakataha.
Hek-ni parakatani gitade, bilsi 18-oni bilsi 44 ong·gipa manderangko tika su·na gita Meghalaya a·dokona pong 43,000 tikarangsan sokbakuengachim aro uandaken da·o a·doko chu·onga gita tikarang dongjahani gimin tika su·aniko dontongatchengna nangaha.
Bilsi 18 batgimin manderangoni bang·batan re·baenggipa antio tikarangko su·e ra·na nisengsotokengachim indiba tikarang bon·angengahani gimin Cowin website-o tika su·na register ka·aniko dontongatchengskaaha.
Bilsi 18-oni bilsi 44-onade tikarangko su·na gita biming segatchengna nanggenchimoba bilsi 45 batgimin manderangde biming segatchenggija health centre-rangona re·ange tikarangko su·e ra·skana man·aiachim.
Da·o dipet Meghalaya a·doko sak 4,63,951 manderang COVID-ni tikako su·e ra·na man·aha aro ianoni sak 3,89,627 manderangde skanggipa tikako aro sak 74,324 manderangde gnigipa tikakoba su·e ra·manaha ine Health official-rang u·iataha.