TURA: Re·anggipa Robibar walonin mikkarang jimbee waanganichi Garo Hills-ni bang·bata biaprangon chirang dal·bana a·bachenge manderangna kenjagokataniko on·angtaiaha.
Robibar walonin mikkarang jime wana a·bachenge Sombar salpaksaona kingkingde Garo Hills-ni bang·bata biaprangon mikkarang jimbee waangaha aro uandaken Garo Hills-ni mongsonggipa chibimarang, jekai Simsang, Ganol aro uandakgipa chiringrangba dal·bana a·bachengaha.
Pangna bilsian da·o gita mikka wachini somoio Garo Hills-ni chibimarang baksana Garo Hills aro Assam a·dokni gisepo donggipa Brahmaputra aro Jinjiram chibimarang dal·bae Garo Hills-ni a·kawe jolrango aro Simsang chibima rikamrango chi bananirangko nikna man·ronga aro Sombar pringoba mikkarang jimbee waangani a·sel chibimarangni dal·baanirangko nikna man·angahachim.
West Garo Hills a·jani a·kawe jolrangoba Robibar walonin mikkarang dongtonggija waangahani a·sel Selsella jolrango donggipa rama jal·langrang nosto ka·ako man·angtaiaha aro adita somoirangna gari gorarangni re·ruraanirangko champengataha ine kobor on·aha.
“Mikkarang da·o walsa salsa dongtonggija waangkugenchimode a·kawe jolrango chi bananirangko nikna man·taignok aro bang·a manderangan nokgri jamgri ong·atako man·taignok,” ine Selsella jolo songdongenggipa manderang parakataha.
Apsan daken, East Garo Hills a·jaoba Robibar walonin mikkarang jimbee waangenba Simsang chibima dal·bana a·bachengahani, East Garo Hills a·jani Deputy Commissioner Swapnil Tembe an·tangan ia biaprangona re·ange nieaha aro chibima rikamrango donggipa manderangko mikrake dongchina didiataha.
“Simsang aro gipin chiringrang rang·san dal·na a·bachengtaiaha, uni gimin adita salrangnade chi sambarango dongjachina u·iatenga. Bi·sa desarangko skatang Simsang chibima sambarango rona watjachina ma·a paarangkoba didiatenga. Chinga obostarangko name nirikkienga,” ine East Garo Hills a·jani Deputy Commissioner, social media gita parakataha.
