TURA: Lockdown-ni somoirango South Garo Hills a·jao niam gri bostu salgipa truck garirangba re·ruraenga ine Garo Students Union (GSU) Mindikgre unit matnangatenba, walni somoirango South Garo Hills a·jaoni North Garo Hills a·jaona dakanggipa ramaona re·ange iandake niam gri re·ruraenggipa garirangko nichina South Garo Hills a·jani Deputy Commissioner-ko didiataha.
COVID-19-na lockdown-ko ra·gatani somoio jachange dongenggipa gipin a·dokrangoni truck garirangko re·angpilna gita re·anggipa May 28 tariko Meghalaya sorkarini Political department-ni ge·etaniko man·soenba Deputy Commissioner on·angahachim.
“Lockdown-ni somoirango FCI, petrol, medical, dud, chi aro uandake manderangni nangchongmotgipa bosturangko salruragipa garirangsan re·rurana man·aia inesa angade ma·siachim indiba South Garo Hills a·jao lockdown-ni somoioba pilak dakgipa garirangan re·rurana man·enga,” ine GSU Mindikgre regional unit-ni president Greneth M Sangma parakataha.
Rongara-oni Dainadubi-ona na·tok salruragipa gari ine see re·enggipa garini bidingo janapatengon, South Garo Hills a·jani Rongara-o aro North Garo Hills a·jani Dainadubi-o na·tok jikgipa biaprang dongja aro ia biaprangona Bangladesh ba Dudhnoi bazar-rangonikosa ra·baskaenga ine Sangma parakataha.
Walni somoirango South Garo Hills a·jaoni North Garo Hills a·jaona dakanggipa ramako re·ange nigenchimode niam gri koela salgipa truck garirangni re·ruraanirangkoba nikna man·enga ineba GSU Mindikgre regional unit-ni president parakataha.
