TURA: Garo Hills-oba COVID-19-ko man·giparang batroroengani gimin Mongolbar salo, Meghalaya a·dokni Chief Minister Conrad K Sangma, Tura-ona re·bae, Garo Hills gimikni deputy commissioner-rang, health official-rang aro dingtang dingtang department-ni official-rang baksa DRDA conference hall-o tom·aniko ong·atangaha.
Ia tom·anio a·dokni Chief Minister, Garo Hills-ni dambonga a·jarango ong·enggipa obostarangni bidingo sing·sandie ra·angenba, mikkangchi COVID-19-ko nambate warachakna man·na gita pilak department-rangkon health department baksa bakrime kamko ka·china didiangaha.
Garo Hills-ni manderangko COVID-ni tikarangko su·ani bidingo chanchirimangengon, bilsi 45 batgimin manderangna tikarangko su·na nangchongmotani bidingo Chief Minister aganangaha aro mikkangchi bang·bata manderangko su·na man·na gita kamrangko ka·china official-rangko didiangaha.
Tura-ona re·baani somoio a·dokni Chief Minister, dingtangmancha ambulance bolgni baksana oxygen concentrator-rangko COVID-19-ni kamrangna jakkalchina gita West Garo Hills a·jani district administration-na pakwate on·angjolaha.
Tura-o COVID-19-ni kamrangko ka·na gita COVID War Room-ko kuliahani gimin ia War Room-koba a·dokni Chief Minister niangjolaha.
Iana skang, Tura-ona re·baengmiting somoio ua, Jengjal-o rikenggipa Cryogenic Oxygen Plant-ona tariangenggipa ramakoba niangjolaha.
Indake ong·engon, Tura jillako nitobatatna kam ka·anirangko, Tura-o rikenggipa Medical college, Tourism aro Tura-o rikenggipa dingtang dingtang kal·susachakram biaprangko nipiltaina gitaba a·dokni Chief Minister, dingtangmancha Mongolbar attamo Tura-ni circuit house-o tom·aniko ong·atangaha.
