TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·kujaengani gimin kamrangko ka·gija jingjengattokengon, Garo Hills-o district council-ko chipate Panchayati Raj-ko ra·bana miksongesa NPP sorkari, GHADC-o kam ka·enggipa manderangni man·gni dormaharangko on·jaenga ine BJP Tura City District Committee matnangataha.
BJP Tura City District Committee-ni general secretary Greham M Danggo-ni parakatani gitade, GHADC-o kam ka·enggiparang bilsi gittam ong·na sipile an·tangtangni man·na nangkuenggipa dormaharangko man·kujaengoba, da·o bilsisani dormahako gital pay scale-o on·genchimode ra·chakna kusi ong·engachim indiba GHADC-ni gital executive committee, uamangna jabongani dormahako gitcham pay scale-osa on·skana manchiskaenga.
“GHADC-o kam ka·giparangna dormaha on·gijaniko chinga NPP dolni ‘political drama’ gitasa nikengaha maina uamang ma·sienga badita dormahako on·ode kam ka·giparang ra·chakgen aro baditako on·ode kam ka·giparang ra·chakjawa. GHADC-o kam ka·giparang kamtangtangko ka·gija dongangkuode GHADC-ko chipna nanggen aro unode Garo Hills-o Panchayati Raj-ko ra·baskana man·gnok ine NPP-ni dilgiparang ma·sienga aro iani giminsa NPP-chi dilenggipa sorkari, GHADC-ni secretary Rikse Marak-koba Tura Municipal Board-ona kam ra·jitangaha,” ine BJP Tura City District Committee-ni general secretary parakataha.
GHADC-o kam ka·giparangko jingjengatna on·jaengani giminba BJP dol, NPP sorkariko matnangataha aro ian NPP dolni bil mesokna jotton ka·aniko mesokani ong·enga ine parakataha.
“NPP sorkari, district administration aro police-rangko jakkale kam ka·giparangko sinjetna jotton ka·enga indiba uamangni dormaha man·gija badita duk mikchiko chakna nangenga ukode nikskajaenga,” ine Danggo parakatenba, GHADC-o kam ka·giparang an·tangtangni man·na nangkuenggipa dormaharangnasa jingjengatenga aro gipin man·gnirangnade jingjengatjaenga ine talatangaha.
NPP-ni camp-ona re·baani ja·man da·ona kingkingan maming ku·rangko on·kujaengani gimin BJP-ni sakgipin MDC Pramod Koch-koba BJP Tura City district committee jegalataha.
“Pramod Koch saksa BJP-ni MDC ong·eba da·onan GHADC-o ong·enggipa obostarangni bidingo ku·rangko on·kujaenga. Ma·mongo BJP dolan sorkariko rikenga ong·ode maini gimin ua jrip dongskaenga?” ine Danggo sing·doangenba, ua da·o BJP-ni mongsonggipa miksonganirangkon guale an·tangni man·gninamangmangsa NPP-ni camp-o dongenga ine matnangataha.