AMPATI: South West Garo Hills a·jao Kumligaon songoni bilsi 91 ong·gipa ANM worker Anati Koch, COVID-19 man·aoni chu·gimik nampilna man·aha ine kobor on·aha.
Kobor on·ani gitade, kang·kare be·ani ja·man ia butchuma, palango tue dongna gita nangengachim aro uko sanenggipa ASHA worker saksa, re·anggipa May-ni 15 tariko COVID-19 positive ong·ahani gimin medical-ni manderang uni nokona re·ange uko porikka ra·e nion uaba positive ong·ahachim.
Sal 10-na uni dingtang nape dongengmiting somoio ua ku·sik ka·ani a·sel mamingkon cha·na man·jahachim indiba 11-gipa salo uko COVID-19-na porikka ra·e nitaion ua negative ong·aha ine kobor on·aha.
Kumligaon songo COVID-19-na porikka ra·anio positive ong·gipa gipin sak 18 manderangba da·o chu·gimik COVID-19-oni nampilna man·aha ine kobor on·timgiparang u·iataha.
