TURA: Budbar salo, Meghalaya sorkarini Principal Secretary Sampath Kumar, West Garo Hills a·jani Asanang PHC-o Pneumococcal Conjugate Vaccine (PCV)-ko a·bachengate on·angaha. Ia PCV-ko Garo Hills gimikon bi·sarangna maming tangka paisa gri, immunisation+ program-rangko ong·ate on·angna sienga.
Asanang PHC-o ia PCV-ko a·bachengate on·angani somoio a·dokni Principal Secretary Sampath Kumar, jinmana aganprakangengon, Meghalaya a·doko pneumonia-o nangchakegipa dingtang dingtang saanirangchi 50 percent-ni gita bi·sarang siangrongenga aro ia PCV-ko a·bachengatanichi sanna man·gijagipa sabisirangoniko bi·sarangko chel·chakna man·gen ine parakangaha.
Detangtangko mikkangchi an·seng baljoke rakkina man·na gita ia tikako on·anio health department baksa bakrimchina gitaba ua ma·a paarangko didiangaha.
Meghalaya a·doko an·seng baljokaniko on·na kam ka·enggiparangko mittelpilangengon, Garo Hills-o bilsi 45 batgimin manderangoni bang·batan COVID-19-ni tikarangko su·e ra·na man·aha aro ian Garo Hills-o COVID-ni giproroaniko champengna dakchakani ong·gen ine Kumar, Garo Hills-o COVID-ko warachakna kam ka·enggipa manderangko mittelpile aganangaha.
Bilsi 45 badegimin manderangoni COVID tikako su·kugijagipa manderangkoba ua ta·raken tikako su·e ra·china didiangaha.
Ia tom·anio Rongram C&RD Block-ni BDO Shelley Ch Momin-ba jinmana aganprakengon, sorkarini on·enggipa cholrangko ra·e an·tangtangni bi·sarangna somoi gita tikarangko on·china ma·a paarangko didiangaha.
Ia program-ko ong·atani bidingo Tura-ni DMCHO Dr Ivonne M Sangma talate on·angskaengon, India a·songo pneumonia man·e bi·sarangni sianirang batroroengani gimin ia PCV-ko India sorkari a·bachengataha aro ia program-ko gipin a·dokrangode skangan a·bachengatmanaha ine parakangaha.
Ia PCV-ko on·ani bidingo janapatengon, PCV-ni skanggipa samko bi·sani jasa ata ong·o, gnigipa samko bi·sani ja 3 ata ong·o aro bi·sani ja 9 ong·ahaon gipin tikarang baksana ia tikako su·gen ine Dr Sangma parakataha.
Ia program-ko ong·atanio dongpae jinmana aganprakanggipa gipin manderangara, Tura-ni Additional District Medical & Health Officer Dr Bijoy Debbarma, Asanang PHC-ni Medical Officer Dr Toksie Marak aro gipinrang ong·a.
Apsan daken, South West Garo Hills a·jaoba ia PCV-ko apsan salon Damalgre sub-centre-oba a·bachengate on·angaha aro iako South West Garo Hills a·jani DM&HO Dr Lily Sengme Ch Marak-ni jakchi a·bachengate on·angskaaha.
