SHILLONG: Meghalaya Energy Corporation Limited (MeECL)-ko privatise ka·na ba gipin a·dokni company-rangchi chalaiskana sorkarini tik ka·aniko Jaintia Hills-ni MLA-rang jegalataha.
Iani bidingo Jaintia Hills a·jani MLA-rang, Bristibar salo tom·e chanchirimangenba, MeECL-ko privatise ka·na sorkarini miksongenganiko raken jegalangtokaha aro ia tom·anio Lahkmen Rymbui, Coming One Ymbon, Sniawbhalang Dhar, Kyrmen Shylla, Wailadmiki Shylla aro Shitlang Pale-ba dongpae bak ra·angaha.
MeECL-ko chalaina gita gipin a·dokni company-rangna pakwate on·skana sorkarini miksonganiko Jaintia Hills a·jani MLA-rang raken jegalenga ine Bristibar salo MLA-rangni tom·ani ja·man a·dokni Home Minister aro Amlarem-ni UDP MLA Lahkmen Rymbui parakataha.
Rymbui-ni parakatani gitade, East aro West Jaintia Hills a·jani saksni MLA-rang, nangrime sorkarini ja·ku de·na miksongenganiko raken jegalenga aro MeECL-ko gipin a·dokni sorkari ba sorkari ong·gijagipa company-rangna pakwate on·jachina dabienga.
“MeECL-ni Aggregate Technical & Commercial (AT&C)-o noksan ong·aniko komiatanikode chinga nangnikenga indiba gipin a·dokni company-rangna pakwate on·anikode chingna nangnikja,” ine Rymbui parakataha.
Myntdu Hydro Electric Project-ko gipin a·dokni company-rangna pakwate on·na tik ka·anikoba Jaintia Hills-ni MLA-rang raken jegalenga ineba a·dokni Home Minister parakataha.
Iani bidingo Jaintia Hills a·jani MLA-rang, a·dokni Chief Minister Conrad K Sangma-ko gronge, MeECL aro Myntdu Hydro Electric Project-ko gipin a·dokni company-rangna pakwate on·jachina didianggen ineba Rymbui parakataha.
Jaintia Hills-o RTPCR test centre aro corona care centre-ko kulie on·an baksana Jaintia Hills-ni dingtang dingtang CHC aro PHC-rangna nanga gita oxygen cylinder-rangko on·china gitaba Jaintia Hills-ni MLA-rang, chief minister-o dabianggen ineba Rymbui parakataha.
