TURA: Re·baenggipa 2022 bilsion Meghalaya a·dokko man·chengaoni bilsi 50 gapengahaoba da·onan Tura jillaoni kilometre 20-mang chel·ao donggipa mitam songrangode mobile network-rangko man·tokkujaenga ine kobor on·aha.
Chokpot sub-division-ni ning·o donggipa Awegre Development Committee-ni secretary Chegan N Marak-ni u·iatani gitade, ia sal somoirango a·gilsak gimikon mobile network-rang donganichi manderang pilak kamrangkon ta·rakbate ka·na man·engoba Chokpot sub-division-ni ning·o donggipa Awegre, Anchigre, Anchenggre, Rongchangre, Pasimgre aro Dana Adugre songrangode da·onan mobile network-rangko man·kujae pilakni gitan ja·manchakna nangskaengachim.
Mingsa aiao inmananide ia songrangara Tura jillaoni km 20-mangsan chel·grikaiachim indiba da·onan ia songrango mobile network-rangko man·skakujaenga ine Awegre Development Committee-ni secretary parakataha.
Iani bidingo Meghalaya a·dokni Chief Minister Conrad K Sangma-na sedoatengon, a·gilsak gimikon ia sal somoirango COVID-19 giproroengani a·sel manderang neng·nikanirangko chagrongna nangtokengon, ia songrangode mobile network-rang dongkujani a·selan koborrangko ra·anio, internet gita chatro chatrirang class-rangko ra·na nanganio, office-ni kamrangko ka·anio aro mongsongbate COVID-ni tikana internet gita bimingrangko segatanioba songni manderang neng·nikanirangko chagrongna nangtokenga ine Awegre Development Committee-ni secretary Chegan Marak parakataha.
“Uni gimin ia songrangoba namroro silroroaniko ra·bana aro mongsongbate manderangni janggi tangani gadangko tang·doatna gita mobile network-ko nangchongmotenga,” ine Marak parakataha.