TURA: AePDS portal-o NFSA aro PMGKAY mirongrangko jaantian 30 aro 31 tarikrangona sualchina gita Dadenggre Civil Sub-Division-ni Sub Divisional Officer (Supply) Jagdish Chelani u·iataha.
Iani bidingo, Dadenggre Civil Sub-Division-ni ning·o donggipa pilak wholesaler-rangkon Fair Price Shop dealer-rangna PDS Calender-o pangchake mirongrangko sokatchina aro Fair Price Shop dealer-rangkoba e-POS ostrorangko jakkale jaantian 30 aro 31 tarikni gisepon suale on·aniko matchotatchina gita Dadenggre-ni SDO (Supply) ge·etangaha.
Indake ong·engon, AePDS portal-ni gita mirongrang dongkuengani gimin chu·gimik 100% jakkalaha ine parakna man·jawa aro AePDS portal-o pangchakesa NFSA aro PMGKAY mirongrangna utilisation certificate-rangkoba parakchina u·iataha.
Mirongrangko jaantian 30 aro 31 tarikni gisepo matchote sualna man·jagenchimode Fair Price Shop dealer-rangni kosako rakgipa ja·kurangko de·gen ine mikrakataniko on·angengon, SDO-ni ge·etanio pangchake Fair Price Shop dealer-rangni kamko nirokchina Supply-ni Sub-Inspector-ko ge·etangaha.
