SHILLONG: Meghalaya a·dokni manderangna aro mongsongbate poraienggipa bi·sarangni namgnina Khasi aro Garo ku·sikrangkoba Central Board of Secondary Education (CBSE)-ni second language-o napatchina gita Shillong-ni Congress MP Vincent H Pala, ma·mong sorkariko didiataha.
Iani bidingo ma·mongni Union Education Minister Dr Ramesh Pokhriyal ‘Nishank’-na seachi mol·molatengon, Meghalaya a·dokosan ong·aigija salgro salaramni gipin a·dokrang aro uandaken dingtang dingtang biaprangoba Khasi aro Garo ku·sikko sena aro aganna jakkalgipa manderang bang·en dongani gimin ia ku·sik minggnikoba CBSE-ni second language dake ra·gatgenchimode ian Meghalaya a·doko songdongenggipa Khasi aro Garorangnasan ong·aigija gipin biaprango songdongenggipa manderangnaba namgni ong·genchim ine Pala parakataha.
“Uni gimin angni a·doko poraienggipa bi·sarangni namgnina Khasi aro Garo ku·sikkoba CBSE-ni gital segatgimin curriculum-o napatchina anga mol·molenga,” ine Union Education Minister-na seatgipa chittio Shillong-ni MP parakataha.
Pala-ni parakatani gitade, Meghalaya a·doko mandeni jelbra jelsuania lak 35-mang ong·a aro ianoni 47 percent-de Khasi ku·sikko agangiparang, 30.86 percent-de Garo ku·sikko agangiparang aro bangkide gipin ku·sikrangko jakkalgiparang ong·a aro iana agreba Khasi aro Garo ku·sikko jakkalgiparang Bangladesh a·songoba bang·en dongachim.
“Gital chapa ka·taigipa CBSE-ni curriculum-o Khasi aro Garo ku·sikrangkode watchanggale komibatgipa jatrangni jakkalgipa Mizo, Tangkhul aro uandakgipa ku·sikrangkosa man·chapatskaahachim. Mizo ku·sikko agangiparangde lak 12-mangsan ong·aia aro Tangkhul ku·sikko agangiparangba lak 1.83-mangsan ong·aiachim,” ine Shillong-ni MP parakatenba, CBSE-ni curriculum-o Khasi aro Garo ku·sikkoba second language dake ra·gatchina ma·mong sorkariko mol·molataha.