SHILLONG: Meghalaya a·dokni manderang gipin antisanade neng·nikaniko chagrongnan nangaikugen, jeon a·dok gimikon gipin antisana May 7-oni 14 tarikona lockdown-ko ra·gatangkuna gita A·dok Cabinet-o tik ka·aha.
A·doko gipin antisana lockdown-ko ra·gatangkuna Cabinet-o tik ka·aha ine Chief Minister, Conrad Sangma aganaha.
A·doko da·o COVID man·giparang komiangrorogenchimoba, A·dok sabisina simsakaniko olgrokatna man·kujawa, unigimin lockdown-ko ra·gatangkuna tik ka·aha ine Pa Sangma aganaha.
“Ian rakbegipa ong·a indiba ching baksa chakchike bakrimkuchina anga manderangko mol·mola, jedakoe an·ching sabisiko bon·atna man·gen,” Pa Sangma aganaha.
Indake ong·genchimoba a·dok sorkari adita niamrangko olgrokatgen aro bading chiwalanirangko kuliani gimin DC-rang paltangtang gita kamrangko ka·agen, chief minister aganaha.
Lockdown ka·ani a·sel a·dokni manderang namen neng·nikanirangko man·enga ine nikatna man·a.
