SHILLONG: A·doko niamgri koela bikotaniko sandie rim·gen ine Chief Minister Conrad Sangmani ku·watani salsagipao, sorkari baksa bakrimenggipa BJP indake aganchakataha je NPP-ni re·dilenggipa MDA sorkari, political-ni gita iako dakna skani dongja.
“Niamgri koela bikotanirangko Sorkarionin champengna skangni dongna nanga, indiba dukni katta, uamango indakgipa skani dongja” ine A·dok BJP dilgipa Ernest Mawrie Sukrobaro aganaha.
Iani bidingo BJP-san namnikjae jegalenga ong·ja, indiba opposition Congress-ba changni changan, a·doko niamgri koela bikotaniko dontongatchina gita janapsimenga, BJP dilgipa aganaha.
“Niamgri cha·ue koela bikotengani giminan a·sel apotrang ong·simsimenga, aro bang·a janggirangan gimaenga, iarang pilakan biapona re·angenba sandianirangko dakjani a·sel ong·enga” ineba ua aganaha.
Niamgri kam ka·anirangko champengatna gita Sorkario skani dongna nanga ine agandapan baksa, sorkari da·o maidake sandianirangko dakatgen aro dosi donggiparangko rim·ama rimjawa uarang pilakkon BJP nirikgen, Mawrie aganaha. A·sel ong·a ong·ao dosi donggiparangko rim·aiana batede iana pangkamgipa cholko sorkari bikotna nanga ineba BJP dilgipa aganaha.
Unaskang, Jaintia Hills, West Khasi Hills aro Garo Hills-o niamgri koela chu·e bikotanirangko sandiatchina gita Opposition Congress-ba dabiahachim. A·dok Sorkari, dabianirangko chu·sokatna re·mikkangenga gita nika.
