SHILLONG: Bangalore-o kam ka·e cha·paenggipa sak 9 Khasi chadamberang, jemangan Coronavirus sabisina lockdown-ko ra·gatani somoio re·bapilna man·gija jachange dongengachim, uamangko bon·kame a·dokona rimbapilna cholko man·aha.
A·dokni sak 9 Khasi chadamberangara Bangalore songjinmao hajirana rakgipa jakni kamrangko ka·e cha·paengachim. Uamang an·tangtangni hajira ka·gimin jagnini dormaharangko man·jaengani bidingo, jen jako dongpagipa tangka-paisarang dongjae namen neng·nikanirangko chagrongna nangao ga·akengachim.
Uamangni jako tangka-paisa dongjae namen neng·nikako man·engmiting somoio, bon·kame uamang Khasi Students Union(KSU), Bangalore unit-na u·iatna man·aha, jean joljol KSU central body-na u·iatskaaha ine koboro janapataha.
Indake ong·engon, Bangalore administration-ni gita sabisini a·sel changni chang lockdown-ko ra·gatahaon, Bangalore-o hajira kam ka·e cha·paenggipa Khasi-rang sak 9-na namen neng·nikanirang sokskaaha ine, KSU General Secretary, Donald V Thabah koborna parakatengon, “KSU Bangalore Unit-ni gita neng·nikaniko chagrongenggipa chadamberangni bidingo chu·gimikkon KSU Central Executive Council-na kobor on·ataha. Ua koboro pangchake bon·kamao chinga uamangko noktangtangona rim·bapilna dakchakanirangko on·ataha,” ineba ua agandapaha.
Uamangko rimbapilna chu·gimikni gita tarisoani bidingo chinga antisa somoiorangko nangaha. Uandake bon·kame da·alo chinga uamangko LGBT Airport Guwahatio-na rimchaksona gita cholrangko man·skaaha, ineba Donald mejal Sonibaro koborna parakaha.
“KSU North Khasi Hills District Unit-ni gita Jorabat-oni gari-gurarangko watate uamangko noktangtangona salange on·aha. Uamang sak 9-oni sak 4 West Jaintia Hills, saksa EJH, sak 3 WKH aro saksa Ri Bhoi-oni ong·a,” ineba koborna parakaha.
