TURA: June 7 tarik pring 5:00 bajioni June-ni 14 tarik pring 5:00 bajiona Meghalaya a·dok gimikon lockdown-ko ra·gatangahaoba, North Garo Hills a·jao manderang an·tangtangna nangchongmotgipa bosturangko brena man·na gita mirong, kari, chini, dal, cha·ani to aro uandakgipa bosturangko palenggipa dokkanrang, June-ni 7 tarik Sombar salo pring 7:00 bajioni attam 4:00 bajiona aro June-ni 11 tarik Sukrobar salo, pring 7:00 bajioni 12:00 bajiona kulina man·gen ine North Garo Hills a·jani Deputy Commissioner u·iataha.
Ia salgnina nangchongmotgipa dokkanrangko kulianio, soe nosto ong·ninggipa me·su-samjak aro biterangkoba apsan salrangon dongimin somoi gita kulina man·gen ine u·iataha.
Deputy Commissioner-ni u·iatani gitade, antigimikna lockdown-ko ra·gatanio, nangchongmotgiparangnade hardware-ni bosturang, jekai cement, rod aro uandakgipa bosturangkoba palatna man·aigen.
An·tangtangna nangchongmota bosturangko brena nokoni ong·katengon, mask-rangko ganchina, jakrangko rongtale rakkijringchina aro saksa sakgipinoni chel·tange dongako ranta ka·china gita Deputy Commissioner u·iataha.
