TURA: Association for Democracy & Empowerment (ADE)-ni dingtang dingtang dilgiparang, Garo Hills-o donggipa pilak zonal aro regional unit-rang baksa nangrime, uamangni gitcham president Dalseng Bira Ch Momin-ko dolona re·bapile president-ni kamko jako ra·taichina gita mol·molataha.
ADE-ni gitcham president Dalseng Bira Ch Momin, kamtangko wate ia bilsini GHADC election-o Amongpara constituency-oni susaahachim indiba rasong grie ua chu·sokgipa ong·na man·jahachim.
Indake ong·engon, da·o gita COVID-19 giproroani somoio ADE-ni membor-rang, dingtang dingtang kamrangko ka·anio neng·nikanirangko chagrongna nangtokenga ine ADE apex committee-ni dilgiparang parakatenba, dolona re·bapile president-ni kamko jako ra·epilchina gita Momin-ko didiataha.
“ADE-ko songchengaonin Momin, saksa ADE-ni founder membor ong·e a·dokni manderangna dingtang dingtang gadango kamrangko ka·aha indiba da·o gita a·doko neng·nikanirangko chagrongna nangengmiting somoio chingna ugita kam changgipa aro u·i-ma·sigipa mandeko nangchongmotenga. Ua dikdiksa somoirangna politics-ni kamo napangahani gimin ua ADE-ona re·bapilna neng·nikenga ine chinga ma·sia indiba ADE-ni dongimin niamrango uni dolona re·bapilaniko maming champenganirang dongja,” ine ADE apex committee-ni chief organising secretary Wisefield D Sangma parakatenba, Momin-ko doltangona re·bapile president-ni kamko jako ra·taipilchina mol·molataha.
Iani bidingo ADE apex committee-ni dilgiparang, mondolini dilgiparang aro dingtang dingtang dolni dilgiparang baksaba agangrikmanaha aro uamangba Momin-ko ADE-ona re·bapilchina nangnikenganiko paraktokaha ineba ADE apex committee-ni chief organising secretary parakataha.
